Senda nova sut il vitg dadens aviarta dapi igl 01-05-2017

DSC02504

 Sepp Zemp en acziun.

foto senda

En cunvegnientscha culs proprietaris ed ils purs dil terren pertuccau ha la Pro Sagogn realisau quella nova senda provisoricamein. Buca bandunei la senda e rimnei per plascher ensemen Vies rumien ed ils excrements da Vos tgauns. Sper quella senda cuan utschals spezials en ignivs silla tiara. Perquei ein tgauns da tener vid la tschenta. Aschiditg ch’ei dat neginas reclamaziuns sa la senda restar aviarta. Duront la pasculaziun (vaccas mumma!) resta la senda serrada.

Engraziel per Vossa capientscha e bien divertiment cun quella nova purschida che la Pro Sagogn ha astgau realisar.

In grond engraziament als proprietaris ed als purs, surtut a Peter Zinsli, Valendau, che han possibilitau la senda.                         

Las turas dad orchideas dils 27-05 e 03-06-2017 ein vendidas ora.

Turas dad orchideas

  DSC03422 DSC03446

Cun Sepp Zemp e Luis Poltéra

Sondas, ils 27 da matg ed ils 3 da zercladur 2017

Liug da s’entupar: parcadi sper scola Sagogn allas 08:30

Ruta: Bargaus-Foppas-Tuora-Planezzas (ca. 4 1/2  uras, 10 km, 400m differenza d'altezia)

La tura meina Vus tier differents plazs dad orchideas e tier bellezia puncts da vesta ella Ruinaulta.  

Da bialaura grillein nus suenter la tura, circa allas 13:00, enta Planezzas. 

Marenda ord il sacados.

Cuosts inclus apéro e bubrondas enta Planezzas: Commembers da Pro Sagogn, indigens, possessurs da cartas da hosps ed affons frs. 5.- per persuna.

Ulteriuras persunas frs. 25.- per persuna.

L’excursiun ha liug era da macort’aura. Buns calzers!

Ulteriuras informaziuns ed annunzias sut Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! ni tier Luis Poltéra, tel. 079 440 69 39.

Ulteriuras turas sin damonda.

Las victuras ed il victur dil ruclar ovs 2017

ruclar ovs 2017 35

Seniester: Lara Gygax, Killwangen, victura teir ils affons pigns

miez: Martin Hunger, Sagogn, victur tier ils carschi

dretg: Emma Knight, Sagogn, victura tier ils scolars

Cordialas gratulaziuns allas victuras ed al victur.

 In grond engraziament a tuttas e tuts participonts e sin seveser l'auter onn da gliendisgis Pastgas (02 d'avrel 2018).

ruclar ovs 2017 33

Fotografias dil ruclar ovs 2017

La casetta da cudische ei vegnida inaugurada ils 15 d'avrel 2017

15 04 2017 15

Il president communal, Hans-Peter Casutt ed Ingrid Meyer da Pro Sagogn taglian il pindel.

15 04 2017 16

In numerus publicum ha visitau l'inauguraziun ch'ei vegnida embellida cun musica dalla "Alphorngruppe Ruinaulta".

La casetta ei aviarta mintga gi dallas 07:00 - 20:00 uras. Mintgin astga prender ni purtar cudischs gratuitamein.

La Pro Sagogn engrazia alla suprastonza dalla vischnaunca Sagogn ed a tut ils gidonters per lur sustegn e spera da saver augmentar cun quella nova purschida puspei in tec l'attractivitad da Sagogn.

Fotografias dall'inauguraziun

 

Plantau enfiarlas

22.03.2017 1

22.03.2017 13

Ils 22 da mars ha la Pro Sagogn plantau 21 enfiarlas da pumera aulta ella tschenta da pumera. Cun quella plontaziun contribuescha la Pro Sagogn al manteniment dalla tschenta da pumera aulta da Sagogn.

In grond engraziament als gidonters, sponsurs e tut quels che han possibilitau quei.

Fotografias dalla plontaziun

 

Niev: Vinars da Pro Sagogn

DSC01660

Igl vinars dalla Pro Sagogn ei producius.

Or da meila che voluntaris han raccoltau igl atun vargau ha la firma Daguot a Glion barschau vinars. Ils dus emprem vinars ein ord Meila d'aur ni ord Berner Rosen.

Nos vinars ein ina specialitad da Sagogn. Els ein vegni barschai ord meila da pumera aulta da Sagogn. La meila ei mai vegnida sprizzada.

Cun la cumpra da nos products sustenis Vus il project da manteniment dalla pumera aulta da Sagogn che la Pro Sagogn ha lantschau il 2015.

Prezis:
Vinars Meila d'aur 0.5l 40% frs. 29.-
Vinars Meila d'aur 0.2l 40% frs. 18.-
Vinars Berner Rosen 0.5l 40% frs. 29.-

Ulteriurs vinars suondan.

Ei ha aunc must da Sagogn: Must pastorisau, buca filtraus en "bag in box" da cartun: 5 liters frs. 14.-, 10 liters frs. 25.-. Quei must san ins conservar sil pli pauc 1-2 onns.

DSC01665 bag in box 5l

Empustaziuns saveis Vus far direct sin Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! ni tier Luis Poltéra 081 921 63 51.

Daniel Vincenz, Vella, gudogna il 6avel turnier da troccas dalla Pro Sagogn

turnier 20 01 2017 64

Ils victurs dil 6avel turnier da troccas dils 20 da schaner 2017 ein: Claudio Camathias, Sagogn (2. seniester.), Daniel Vincenz, Vella (1.) e Josef Cadruvi, Schluein (3., dretg).

Cordialas gratulaziuns als victurs.

Grazia al grond engaschament da Renata Cathomas e Johann Cantieni ha ei danovamein dau in niev record da participonts. 40 persunas da Mustér tochen Turitg han battiu per la victoria. Danovamein ein biars giuvens separticipai, il pli giuven era, cun 14 onns, Anian Camathias, il fegl da Claudio.

Renata Cathomas ha schau far l'artista Yvonne Gienal (Glion)  ina trofea specialmein per ils victurs da nies turnier ed ella ha era gest sponsurau quels premis. Il maletg da quella trofea muossa las quater colurs dallas troccas. Era per quels fetg bials premis in grond engraziament a Renata. Nus engraziein era al organisatur Johann Cantieni, sia dunna Jeannette per l'ustria ed a lur fegl Gion-Andri per la lavur cul computer.

In grond engraziament a tut ils participonts, specialmein al president dall'Uniun grischuna da troccas, signur Andreas Muot, Panaduz. Nus sperein che tuts seigien stai cuntents cul turnier e ch'els turnien puspei a Sagogn.

Fotografias 6avel turnier da troccas

 

Nova punt sul Rein

DSC00959

DSC00964

 

Dapi ils 22 da december 2016 ei la punt sul Rein denter Schluein e Castrisch aviarta.

La Pro Sagogn ei vegnida undrada cul Prix Benevol GR 2016

Prix Benevol 03.12.2016 9

Prix Benevol Graubünden: Preisgekrönte Freiwilligenarbeit

Viele Menschen engagieren sich täglich freiwillig und unentgeltlich in verschiedensten Lebensbereiche und erbringen dadurch eine unbezahlbare Leistung für unsere Gesellschaft. Für viele Menschen ist dies selbstverständlich.

Benevol Graubünden und die HTW Chur würdigen und anerkennen mit dem Prix Benevol Graubünden diese Leistungen und machen sie sichtbar.

Pro Sagogn ha survegniu il premi per sia lavur en favur dalla tschenta da pumera aulta e dallas orchides da Sagogn.

Ils ulteriurs victurs dallas categorias ein: Tschernobylhilfe Surselva, Kath. Frauenbund GR, IDEM-Im Dienste eines Mitmenschen ed il Teater Muntanellas.

Da vender: procucts naturals dalla pumera aulta da Sagogn

DSC09522

La puma ei raccoltada, ils products ein produci.

Naven dall'entschatta settember entochen la fin d'october han varga 30 persunas da Sagogn, dalla Lumnezia tochen Turitg, susteniu la Pro Sagogn tier las differentas raccoltas. Els han prestau bunamein 400 uras da lavur cumina. In fetg grond engraziament ad els! En tut ha la Pro Sagogn raccoltau varga 4500kg meila en 12 curtgins. Ord quella havein nus saviu far 2105 liters must e circa 30 kg meila turrida. Con vinars ch'ei dat savein nus aunc buc. Tut ils fretgs ein vegni rimnai da pumera aulta da Sagogn. Il mèl d'aviuls ei era vegnius raccoltau sin quella pumera d'aviuls d' Anton Panier. 

Cun la cumpra da nos products sustenis Vus il project da manteniment dalla pumera aulta da Sagogn. Senza tgira va la tschenta da pumera aulta da Sagogn pli e pli en decadenza e svanscha forsa culs onns per la gronda part. Ella ei denton digna da vegnir protegida, ella ei in impurtont bein cultural, ella embellescha la fatscha dil vitg ed ella promova la biodiversitad dalla cultira da Sagogn.

Nos products ein pli che mo bio

La pumera ei mai vegnida sprizzada, la raccolta vegn fatg a maun, ils products han negins mieds da conservar e vegnan produci ella regiun. Il must vegn fatgs ella mustaria a Glion, il vinars vegn barschaus tier Daguot a Glion. Turri vegnan ils fretgs a Sagogn. La Pro Sagogn ha cumprau ina scaffa speciala per torrer per varga frs. 6000.- . Ord quels motivs ein nos products pli cars che quels tier fatschentas grondas. Persuenter protegis Vus igl ambient, sustenis Vus la natira, nies project da protecziun, fatschentas regiunalas e survegnis ultra da quei aunc products fetg gustus.

Nos products actuals:

Must pastorisau, buca filtraus en "bag in box" da cartun: 5 liters frs. 14.-, 10 liters frs. 25.-. Quei must san ins conservar sil pli pauc 1-2 onns.

Meila turrida da suandontas sorts: Berner Rosen, Boskoop, Meila d'aur, Meila zenn (pli ascha/amara) ni pacs mischedai. 100gr per frs. 6.50

Fetg pauca prema da Sagogn turrida (fetg dultscha): 75gr frs. 6.50

Mèl d'aviuls 500gr frs. 16.-

Empustaziuns saveis Vus far direct sin Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! ni tier Luis Poltéra 081 921 63 51.

Era el Volg Sagogn ni ella stizun "negozi" a Glion saveis cumprar differents products da nus ed aschia sustener era quellas stizuns.

Las ustrias da Sagogn han survegniu must per vender, dumandei suenter!

Il concert classic ei staus grondius

DSC00028

Il concert "Tuns da lenn e tuns da l'orgla" cun Ursina Brun (dretg), Gion Andrea Casanova e Giusep Tschuor (seniester) ha carmalau ils 23 d'october 2016 biara glieud ella baselgia catolica da Sagogn. La baselgia era bunamein occupada sin il davos plaz. Ils visitaders han saviu guder in grondius e fetg variont concert cun ovras dil baroc e dalla romantica. Da Gion Andrea Casanova ei vegniu sunau "Canzun senza plaids", in toc per flauta ed orgla.

Fotografias dil concert