Il calender dalla Pro Sagogn 2017 ei cumparius

pro sagogn kalender 2017

Il calender cun fotografias da Sagogn saveis cumprar per frs. 25.- el Volg, sin canzlia, tier l'uniun da traffic Sagogn ni pustar el sin Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Meila turrida da pumera aulta da Sagogn el Volg

DSC09709

Il Volg Sagogn venda products da pumera aulta da Sagogn che la Pro Sagogn producescha el rom dil project da manteniment dalla tschenta da pumera aulta da Sagogn.

Quels fretgs vegnan buca sprizzai ed ils products ein senza mieds da conservar.

Cun la cumpra da nies products sustenis Vus il project da manteniment dalla tschenta da pumera aulta da Sagogn.

Pil mument dat ei mo meila turrida cunquei che tut il must ei gia vendius ora. Circa miez d'october duess ei puspei dar must.

Excursiun da bulius 24-09-2016

DSC09557

Era sch'ei haveva buca biars bulius ei l'excursiun stada in cumplein success.

Igl emprem ein ils presents vegni partgi si sin ils treis experts da bulius Lia Heini, Egmont Heisch e Fernando Sgier. Lu ei mintga gruppa ida en in auter liug egl Uaul Grond. Suenter strusch duas uras ein tuts puspei vegni ensemen ed han saviu mussar lur raccolta. Quella ga eis ei buc iu per rimnar schi biars bulius sco pusseivel, mobein da rimnar differentas sorts. Quels ein lu vegni controllai ed erui dils treis experts. Per mussar la gronda diversitad da bulius havevan els preparau ina grondiusa exposiziun cun varga 70 differentas sorts. Ina gronda part da quels bulius exponi han els mussau detagliadamein. Quei ei stau immens interessant.

Suenter l'excursiun ha ei dau tier Ingrid Meyer in apéro ed in stupent risot.

In grond engraziament als experts ed ad Ingrid per lur grond engaschament.

Fotografias dall'excursiun da bulius

La Pro Sagogn al marcau da Sagogn dils 17-09-2016

DSC09386

Il pomolog Gaudenz Zanetti da Zezras ha organisau l'exposiziun da puma a Sagogn. Ensemen cun Gion Tumaisch Deplazes e Gion Rudolf Caduff ha el informau visitadras e visitaders sur dalla puma da Sagogn. Cun varga 40 differentas sorts da meila ha Sagogn ina gronda variaziun da meila. Biars visitaders ein stai fetg surstai da quella diversitad. Cun quella exposiziun ha la Pro Sagogn era saviu presentar in pau igl intent dil project da manteniment da pumera da Sagogn.

Cun quella caschun ha la Pro Sagogn era vendiu per l'emprema ga must el rom dil project da manteniment dalla pumera. Surprendentamein ha ella vendiu tut ils varga 500 liters must ch'ella haveva produciu ils davos gis. Per saver furnir tut las empustaziuns sto ella puspei far must la proxima jamna.

Fotografias dil stan dalla Pro Sagogn

Igl emprem gi da raccolta dalla Pro Sagogn ei staus in success

DSC09211 Large

Ruedi Candrian ha scurlau mordio!

Varga 15 persunas han dau suatientscha al clom d'agid per raccoltar l'emprema meila el rom da nies project da nezegiar la puma da Sagogn. Voluntaris da Duvin, Morissen, Glion, Laax, Flem, Sagogn e schizun da Turitg ein vegni per gidar. Sper meila d'aur havein nus era saviu raccoltar Berner Rosen. En tut han ils gidonters rimnau 28 haras meila, quei vul dir circa 800kg. Cun quella meila essan nus i ella mustaria a Glion. Ei ha dau circa 500 liters must.

A gidontras e gidonters in fetg grond engraziament.

Al marcau da Sagogn dils 17 da settember vegn quei must dalla pumera aulta da Sagogn vendius. Naturalmein saveis era empustar il must sin suandonta adressa: Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Nus offerin bag in box da 5l per frs. 14.- ni da 10l per frs. 25.-. Cun la cumpra da quei must sustenis Vus il project da manteniment dalla tschenta da pumera aulta da Sagogn.

Singulas bag in box furnin nus gratuit a Sagogn. Quantitads pli grondas era el contuorn.

Fotografias dil gi da raccolta

Exposiziun da puma al marcau da Sagogn dils 17-09-2016

DSC01077

Il pomolog Gaudenz Zanetti duront l'inventarisaziun dalla pumera a Sagogn 

Sche Vus vuleis planter enfiarlas ni era mo mirar tgei sorts puma ch’ei dat a Sagogn, visitei il stan dalla Pro Sagogn al marcau dil vitg. Il spezialist da puma, Gaudenz Zanetti expona ca. 30 sorts meila e péra. El declara ils avantatgs e disavantatgs dils differents fretgs. Vus saveis era degustar differents fretgs e must da Sagogn. Sche Vus haveis fretgs nunenconuschents en Vies curtgin astgeis purtar els per schar eruir lur nums. 

Segau Planezzas ils 03 da settember 2016

DSC08990

Dapi il 2012 tgira la Pro Sagogn ina "pastira dad orchideas" enta Planezzas. Era uonn han 9 persunas dau suatientscha al clom d'agid e han, ensemen cun Fabian Rungger dall'uniun da traffic Sagogn, segau la parcella. Plascheivlamein han gidontras da maneivel e lunsch susteniu nus. Johann Cantieni maunca sin la fotografia.

In special engraziament va a Svetlana ch'ei vegnida extra si da Turitg per gidar nus!

Era a tut tschels gidonters e surtut a Fabian, el ha gia entschiet il gi avon a segar, in grond engraziament.

Senza quels gidonters savessen las orchideas buca vegnir tgiradas taluisa.

A l'uniun da traffic Sagogn ed alla vischnaunca Sagogn engraziein nus fetg per las maschinas.

Fotografias dil gi da segar

Nezegiar la puma da Sagogn: encuretg gidonters!

DSC00928

Per il project da tgirar e revitalisar la tschenta da pumera e las orchideas da Sagogn ha la Pro Sagogn retschiert igl atun vargau il premi da giubileum dalla Pro Natura Grischun. La primavera ha l‘uniun entschiet cun las empremas lavurs els curtgins cun pumera aulta. Sin las parcellas che nus havein giu a disposiziun han persunas dil fatg tagliau plontas. Proximamein ein ils emprems fretgs madirs. La Pro Sagogn vuless nezegiar meglier quels fretgs e buca schar ir tons a mal. Per quei intent encurin nus gidontras e gidonters per la raccolta e per l’utilisaziun dalla puma. Sper la vendita da puma frestga eis ei previu da far must e vinars sco era da sechentar fretgs. Tgi che ha interess da gidar il settember ni october duront singuls gis vid la raccolta ni la producziun vegn supplicaus da s’annunziar tier Luis Poltéra, tel. 081 921 63 51 ni Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! . Cunquei che las lavurs sedrezzan suenter la madiraziun dils fretgs ein ils datums da lavur aunc buca fixai. Gidonters e gidontras vegnan dumandai a cuort termin per mail ni per telefon. Bugen pren la Pro Sagogn era encunter damondas per raccoltar ulteriura puma. La puma da Sagogn ei fetg gustusa ed ei fuss donn da schar ir ella a mal.

Segar Planezzas 03-09-2016: encuretg gidonters!

DSC05283  DSC05289

DSC05347  DSC05367

La pastira enta Planezzas sto puspei vegnir segada per che las orchideas sappien crescher meglier.

Nus encurin gidonters. Tgi che ha duei prender cun in risti.

Sentupada: sonda, ils 3 da settember 2016 allas 08:30 sil parcadi dalla scola.

Vegn menau atras da bunamein mintg'aura.

Cuoz: tochen circa las 12:00, sche l'aura ei buna dat ei suenter ina grillada.

Pro Sagogn offerescha las bubrondas e la grillada.

In'annunzia tier Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! ei buca necessaria, levgescha denton l'organisaziun.

Grazia a nossa tgira sur onns ein uonn carschi per l'emprema ga SIAT differentas sorts orchideas sin quella parcella!

Las visetas guidadas cun Augustin Beeli ein stadas fetg tschercadas

DSC08319

Allas duas visetas guidadas dils 16 e 29 da fenadur 2016 ha la Pro Sagogn astgau beneventar biars interessai.

Cun sia immensa savida ha il historicher local Augustin Beeli incantau ils participonts.

Ella Ruinaulta dils 22 da fenadur 2016 saveis leger dapli detagls dalla guidada (mirei aschunta).

Suenter quei grond success d'uonn vegn la Pro Sagogn era ad organisar il proxim onn duas guidadas.

Pro Sagogn engrazia ad Augustin per siu engaschament e per sia promtadad da menar atras era il proxim onn las guidadas.

Fotografias guidada 29-07-2016 

Biars participonts allas turas dad orchideas 2016

DSC05798

Alla tura dad orchideas dils 28 da matg ein varga 40 persunas, alla tura dils 4 da zercladur bunamein 30 persunas separticipadas. Nus havein deplorablamein buca saviu acceptar tut las annunzias per ils 28 da matg.

Sper ina bellezia vesta sin la Ruinaulta han ils menaders Sepp Zemp e Luis Poltéra saviu mussar l'emprema ga 11 e sin la secunda tura 15 differentas sorts dad orchideas en fluriziun.

Il punct culminont ein puspei stadas las "melli" Pantoflas-Nossadunna egl Uaul Grond. Quellas han incantau ils participonts ch'ein per part aposta vegni si da Turitg. Ulteriuras persunas ein vegnidas da Domat, Panaduz, Razén, Tusaun e Masein. Era quater hosps dall'America, ch'ein cheu en vacanzas, han schau plascher fetg la tura. 

In grond engraziament a Sepp Zemp ed a Steffi Poltéra per lur grond agid ed ad Ernst Hess per las meisas ed ils bauns ch'el ha schanghegiau a Pro Sagogn e che nus havein saviu duvrar per l'emprema ga.

Ils 30 da matg ha la Pro Sagogn astgau menar 13 dunnas dall'uniun da dunnas Sevgein sin la pintga tura da Planezzas.

RTR 08-06-2016: http://www.rtr.ch/novitads/grischun/surselva/sagogn-e-in-eldorado-per-orchideas

 Fotografias dallas turas dad orchideas 2016

Fotografias da tut las orchideas da Sagogn