Success per treis uniuns dil vitg

Il zercladur 2007 vegn a restar en memoria sco meins dil cant e dalla musica. Igl ei stau differents success che van ella cronica dil vitg. Uniun da musica Alla fiasta cantunala da musica a Scuol (15.-17.06) ha l'Uniun da musica da Sagogn contonschiu in success historic en sia historia da 46 onns: Cun 170 da 180 tiel toc da pag e 175 da 180 puncts maximals tiel toc da pensum ha la musica da Sagogn gudignau cun grond avantatg da 35 puncts la concurrenza dallas musicas da brass. Suenter Sagogn cun 345 puncts suonda Falera cun 310 e Breil cun 308 puncts. Cunquei ei l’Uniun da musica da Sagogn gia la tiarza gada campiun grischun. L'Uniun da musica da Sagogn ha fatg tutta honur a nossa vischnaunca. Cordiala gratulaziun e grond cumpliment a musicantas e musicants, secapescha ordavon al dirigent Silvio Lechmann. Chor viril Sagogn Dalla fiasta districtuala a Domat (02-03.06) ei il Chor viril da Sagogn turnaus cun ina gronda satisfacziun: Cullas duas canzuns da pag "La glina gira" dad Alvin Muoth e "Danunder" da Gion A. Derungs ha ella contonschiu il predicat "fetg bien". Pil chor eis ei in tierm impurtont che vegn ad ir ella historia dil chor. Pertgei il chor viril ei sepresentaus avon ils experts senza notas, ha pia cantau ordadora. Grond cumpliment al dirigent Gion Cavelty per quei success cun ses 32 cantadurs. Chor baselgia evangelic Il chor mischedau reformau ei separticipaus l'emprema gada ad ina fiasta da cant. La dirigenta Daniela Candrian ha sedau fetg gronda breigia dad exercitar cun ses 20 cantaduras e cantadurs. Il predicat "bien" dallas canzuns "Retuorn dils utschals" ed "Onn per onn" duess buca demotivar, mobein animar e motivar da puspei separticipar ad ina fiasta. Tgisà, forsa ensemen cul chor mischedau catolic.