Toni Steger gudogna igl 8avel turnier da troccas dalla Pro Sagogn

25 01 2019 51

Ils victurs digl 8avel turnier da troccas dils 25-01-2019:

Peter Montalta, Schluein (3., sen), Toni Steger, Glion (1.) e Linus Deplazes, Rabius (2.). Cordialas gratulaziuns.

Al turnier dil 2018 haveva la giuvna Laura Jemmi aunc dumignau Montalta e Steger. Uonn han els giu dapli cletg ed han gudignau mintga scart. Quei cletg han buca tut ils profis giu, sco per exempel il passiunau trochist Paul Marty che ha buca gudignau in soli giug ed ha terminau il turnier sco davos. El ha priu quei cun humor (mirei la fotografia ella gallaria).

Cun 48 participontas e participonts ha la Pro Sagogn astgau registrar in niev record. Igl ei fetg legreivel che biars trochists novs, denton era trochists versai prendan part al turnier a Sagogn. Denter quels ein Peter Montalta, il campiun grischun dil 2015, la campiunessa grischuna dil 2018, Renata Cathomas, la vicecampiunessa grischuna dil 2018, Flurina Cathomas ni il niev vicecampiun grischun dil 2019, Vitus Dermont. In noviz ei staus David Flurin Cabernard da Glion, cun 10 onns il pli giuven participont. In grond bravo.

In grond engraziament alla menadra dil turnier, Renata Cathomas, per siu engaschi e per ils bials diploms dall' artista Yvonne Gienal ch'ella ha schau crear. Medemamein engraziein nus ad Annalisa Cathomas ed ad Andrea Marty per la registraziun dalla gliesta da rangaziun.

Agl organisatur dil turnier, Johann Cantieni ed a sia dunna Jeannette (restauraziun), engraziein nus per la perfetga organisaziun.

In special engraziament a tut las participontas e tut ils participonts per lur preschientscha. Nus sperein sin in seveser il 2020.

Fotografias dil turnier 2019