intent

Cun ina sera d'orientaziun il fevrer 2006 ha la gruppa «Sagogn futur» presentau sia lavur d'in onn. A caschun da quella ha ina gronda maioritad dils presents exprimiu il giavisch che la gruppa dueigi cuntinuar cullas activitads entschevidas. Suenter ina analisa dallas differentas pusseivladads havein nus viu l'integraziun da «Sagogn futur» el Cerchel cultural Sagogn sco megliera sligiaziun. Ils 22 d'uost 2006 han las duas gruppaziuns lu era concludiu da fusiunar.

Il num PRO SAGOGN declara era gia tut davart il scopo dall'uniun. Ella duei sustener las pli differentas activitads a favur dalla vischnaunca da Sagogn e dar impuls pil svilup da quella. La fusiun garantescha ina cuntinuitad dallas activitads d'entochen ussa dil Cerchel cultural, per exempel il Kino Open Air, il ruclar ovs si Plaun Pigniel, prelecziuns, referats ed auter pli. Novas activitads ein planisadas. Aschia dueien ils nums da funs da Sagogn vegnir inventarisai e documentai, ultra da quei ein seras da discussiun previdas. Era novs projects dueien haver liug, tals vegnan realisai sch'il sustegn dalla populaziun ei cheu.

Cun Vies commembradi saveis Vus gidar ad augmentar l'attractivitad da Sagogn. La contribuziun annuala ei fr. 20.-- per commember/famiglia respectiv fr. 200.-- per commembers collectivs/fauturs. Ei fagess grond plascher, sche Vus sustenesses nossa lavur cun Vies commembradi ni cun ina donaziun. Donaziuns voluntaras alla Pro Sagogn astgeis Vus trer giu dalla taglia.

Nossa banca: BCG, 7002 Cuera, IBAN  CH42 0077 4110 4543 9120 0

Sper il sustegn finanzial essan nus secapescha era engrazieivels per Vossas ideas e projects. Buca hagies retenientschas d'annunziar Vos giavischs.

PRO SAGOGN – Per Sagogn!

Attachments:
Download this file (ES Pro Sagogn.pdf)Cedel da pagament pdf[ ]626 kB